Gazetari i emisionit “Përtej Traditës”, Shkëlzen Hënkoja, është nderuar me titullin “Ambasador i Paqes”, një vlerësim që i është akorduar për kontributin e tij të pandërprerë gjatë 24 viteve në median shqiptare, veçanërisht në trajtimin e kronikës sociale dhe në evidentimin e problematikave që prekin shtresat më në nevojë të shoqërisë.
Ky vlerësim është një mirënjohje për punën e tij shumëvjeçare në shërbim të komunitetit, ku përmes reportazheve dhe emisioneve ka sjellë në vëmendje historitë e familjeve që jetojnë në varfëri, të fëmijëve jetimë dhe të personave në kushte të vështira ekonomike, duke u bërë shpesh ura lidhëse mes tyre dhe njerëzve që kanë ofruar ndihmë.
Prej tetë vitesh, Hënkoja ka qenë një nga bashkëpunëtorët më aktivë pranë Fondacionit Firdes, duke kontribuar në identifikimin dhe mbështetjen e qindra familjeve në nevojë në mbarë vendin. Përmes punës së tij në terren, ai ka ndihmuar që shumë histori të mos mbeten të padëgjuara, por të kthehen në shembuj solidariteti dhe humanizmi.
Ceremonia u zhvillua në ambientet e Ambasadës së Paqes, ku për gazetarin ishte rezervuar edhe një tjetër surprizë e veçantë. Përveç titullit “Ambasador i Paqes”, ai u emërua edhe Drejtor Ekzekutiv i Fondacionit “Kujdestari i Fëmijëve”, një përgjegjësi e re që synon të forcojë angazhimin e tij në mbrojtjen dhe mbështetjen e fëmijëve dhe familjeve në nevojë.
Në fjalën e tij përshëndetëse, Shkëlzen Hënkoja e konsideroi këtë vlerësim jo vetëm si një arritje personale, por si një përgjegjësi edhe më të madhe për të vijuar misionin e tij në shërbim të njerëzve.
Ai ia dedikoi këtë nderim vendlindjes së tij, Gramshit, qytetit ku u lind dhe u rrit, duke e cilësuar atë si një trevë që ka trashëguar dhe kultivuar ndër breza vlera të paqes, bashkëjetesës dhe solidaritetit.
“Ky titull nuk më përket vetëm mua. Ai i përket familjes sime, miqve, kolegëve, të gjithë njerëzve që kanë besuar tek unë dhe, mbi të gjitha, qytetit tim të Gramshit, i cili më ka mësuar vlerën e respektit për njeriun. Pa paqe nuk ka humanizëm, dhe pa humanizëm nuk mund të ndërtojmë një shoqëri më të drejtë,” u shpreh Hënkoja.
Ai theksoi se gazetaria nuk duhet të kufizohet vetëm në raportimin e ngjarjeve, por duhet të jetë një mision në shërbim të qytetarëve, duke i dhënë zë atyre që shpesh nuk kanë mundësi të dëgjohen.
Titulli “Ambasador i Paqes” dhe detyra e re si Drejtor Ekzekutiv i Fondacionit “Kujdestari i Fëmijëve” vijnë si një vlerësim për një rrugëtim 24-vjeçar të ndërtuar mbi përkushtimin, humanizmin dhe besimin se media mund të jetë një instrument i fuqishëm për të sjellë ndryshim pozitiv në shoqëri.
